La doctrine curieuse des beaux esprits de ce temps

Maxime 1. Il y a fort peu de bons esprits au monde : et les sots, c'est a dire, le commun des hommes, ne sont pas capables de nostre doctrine : et partant il n'en faut pas parler librement, mais en secret et parmy les bons esprits, confidans et cabalistes. Exposition et preuve de cette maxime. Cette maxime suppose quatre propositions comme principes evidens de leur doctrine. 1 que les seuls libertins ont l'esprit bon, comme personnes curieuses, qui taschent d'entrer jusques dans le secret des causes naturelles, et secouer le pesant joug de la superstition, qui tient les esprits en minorite, et faict, que sans ozer examiner ce qu'on nous propose, nous nous laissons aller a l'accoustumance, et traisner comme buffles ayant l'esprit interdit : et demeurant tousiours par une humeur bigotte et pedantesque, comme des enfans sous la ferule. Ii qu'il faut sonder les esprits, recognoistre leur force ou leur foiblesse, et tascher de mettre hors de page ceux qui seront capables de se laisser mener a la raison et tirer hors de cette enfance ridicule, qu'il faut leur faire le mesme office que Socrate se vantoit d'avoir faict a la jeunesse d'Athenes, disant qu'il estoit la sage femme des esprits : qui les mit au monde, qui polit leur nature, de rude et brute qu'elle estoit, et qui leur attacha ces deux belles aisles tant renommees dans la philosophie platonicienne pour s'eslever jusques dans cette prerie mysterieuse, laquelle ils appelloient en leur cabale, la prerie de verite, et la posoient dans une region amoureuse, (...).